Иванов ќе се обрати на Минхенската безбедносна конференција

Автор: Редакција ФОРУМ     09:54 | 06 февруари 2010

Претседателот Ѓорге Иванов ќе има свое обраќање на Минхенската безбедносна конференција во рамките на панел дискусијата „Иднината на европската и глобалната безбедност“

Претседателот Иванов на маргините на конференцијата треба да оствари и билатерални средби со високи функционери од повеќе земји на кои ќе се потенцираат сите прашања од сферата на безбедноста и уделот на Македонија во меѓународните мисии.
На 46. Минхенска безбедносна конференција, која почна во петок попладне а ќе трае до недела, учествуваат 300 шефови на држави, влади, високи функционери, опозициски лидери и претставници на организации од целиот свет.
Конференцијата вчера ја отвори претседавачот Волфганг Ишингер, а во воведниот дел говореа и германскиот министер за одбрана Карл-Теодор Гутенберг и министерот за надворешни работи на Кина, Јанг Џиечи.
Покрај дискусиите за традиционалните теми како што се трансатлантската и европската безбедносна архитектура, конференцијата се фокусира на безбедноста и стабилноста во поширокиот регион на Блискиот Исток, како и на разоружувањето, контролата врз вооружувањето и нуклеарното разоружување. Ишингер се надева дека ќе добие нови информации за рускиот предлог во однос на европската безбедносна архитектура и за потпишувањето на американско-рускиот договор за намалување на стратешки оружја (START 2). Панел дискусиите годинава се фокусираат и на Авганистан и новата стратегија на НАТО.
Во последните децении Минхенската безбедносна конференција стана една од највлијателните и најголемите конференции за безбедносна политика во светот. Секоја година на неа присуствуваат клучни личности од целиот свет кои се вклучуваат во интензивната дебата за актуелните и идни безбедносни предизвици.
Минхенската безбедносна конференција првпат е одржана во 1962 г. а ја иницирал Евалд Фон Клајст. Од 1999 г. до денес во конференцијата се вклучуваат се повеќе земји од централна и источна Европа, азиски држави, а учествуваат и претставници на бизнис секторот. Од 2008 г. претседавач со Минхенската безбедносна конференција е Вофганг Ишингер и таа под негово раководство се фокусира пред се на идните безбедносни предизвици во согласност со концептот „мрежна безбедност“.