Австралија ја притвора вратата за доселеници

13:15 | 08 февруари 2010

Министерот за имиграција најави заострени услови за добивање жителство или работна дозвола за престој во земјата

Австралискиот министер за имиграција, Крис Еванс, најави промени во политиката за да привлече повеќе високо образувани работници. Тој ја критикуваше досегашната политика, која им овозможуваше на луѓето што сакаат да се доселат во Австралија, да добијат жителство само затоа што се запишале на курсеви за кулинарство или за фризери.

Министерот најави дека Австралија ќе ја укине постоечката листа од 106 занимања што се бараат во земјата и дека ќе ги преиспита тестовите што се користат за проверка на квалификациите на луѓето што побарале жителство или работна дозвола. Неговите забелешки беа поздравени од рударскиот сектор, кој се бори да одговори на побарувачката на суровини во Кина.

"Имавме десетици илјади студенти што се запишани на кулинарство, сметководство или за фризери, затоа што тоа беше на листата, и затоа што тоа им овозможуваше постојан престој“, изјави Еванс за Австралиското радио.